घोराही, ४ पुष । नेपाल कम्युनिस्ट पार्टी घोराही नगरले नेपाल सरकार र नेपाल कम्युनिस्ट पार्टीबीच भएको तीन बुँदे सहमति कार्यान्वयन गर्न दबाब सिर्जनाका लागि घोराहीमा मसाल जुलुस गरेको छ । पार्टीको पूर्व घोषित कार्यक्रम अनुसार पार्टी घोराही नगरले सोमबार घोराहीमा मसाल जुलुस गरेको हो ।
कोणसभालाई सम्बोधन गर्दै नेकपा घोराही नगरका इञ्चार्ज महान सीले नेपाली जनताको मुक्तिको लागि लडेको नेपाल कम्युनिस्ट पार्टी र नेपाल सरकारबीच भएको तीन बुँदे सम्झौता दुई वर्षसम्म पनि कार्यान्वयन नगरेको भन्दै आफूहरुले बाध्यात्मक रुपमा दबाब सिर्जना गर्नु परेको बताए । उनले यो देशमा जबसम्म नेपाली जनताको अधिकार प्राप्त हुन्न त्यतिबेलासम्म आफूहरुले क्रान्ति जारी राख्ने र एकीकृत जनक्रान्तिको कार्यदिशामार्फत वैज्ञानिक समाजवादी व्यवस्था स्थापना गर्ने उद्घोष गरे ।

त्यसैगरी कोणसभालाई सम्बोधन गर्दै नेपाल कम्युनिस्ट पार्टी सहायक संंगठन युवा संगठन नेपाल दाङका सचिब पदम सीले नेपाल सरकार र नेपाल कम्युनिस्ट पार्टीबीच भएको तीन बुँदे सहमति कार्यान्वयनका लागि ल्याइएको अध्यादेश राष्ट्रपतिसमक्ष गएर रोकिनुमा दलाल राज्यसत्ता र दलाल साम्राज्यवादीको षडयन्त्र भएको बताए । उनले तीन बुँदे सहमति कार्यान्वयनका लागि पार्टी र सरकारबीच पटक–पटक वार्ता तथा सम्बाद भएको २१ महिना हुँदा समेत सो सहमति कार्यान्वयनका लागि राज्यसत्ताले विभिन्न षडयन्त्रहरु गरिरहेको जिकिर गरे ।

‘यो देशका राष्ट्रपति जनताका राष्ट्रपति होइनन्,’ उनले भने त्यो कपि वलीको इसारमा चल्ने राष्ट्रपति हुन् । वलीले अध्यादेश ल्याउने बेलामा उनले अध्यादेशको अध्ययन नगरी प्रमाणीकरण गरेर अध्यादेश जारी भएको थियो । अहिले आएर यो राष्ट्रियतासँग, देशको जनजीविका र जनतन्त्रसँग जोडिएको देशको राजनीतिक संकटलाई समाधान गर्नको लागि सरकार र पार्टीबीच भएको तीन बुँदे सहमति कार्यान्वयमा षडयन्त्र भइरहेको छ ।’
अहिले यो विवादित समयमा अध्यादेश ल्याएर जसरी रोक्ने नाटक मञ्चन भइरहेको छ । त्यो हामीलाई कदापी स्वकार्य हुनै छैन् । यो अध्यादेश कुनैपनि हालतमा प्रमाणीकरण गरेर राष्ट्रपतिले जारी गर्नुपर्छ उनले भने ।

घोराहीको लोक दोहोरी साँझ नजिकैबाट निकालिएको मसाल जुलुस तुलसीपुर चोकमा पुगी कोणसभामा परिणत भएको थियो । कोणसभाको सहजीकरण नेकपा घोराही नगर सेक्रेटरी दानबहादुर सीले गरेका थिए ।

त्यसैगरी नेकपा लमही नगरले पनि   मशाल जुलुस सहित कोण सभा प्रदर्शन गरेको छ ।

मशाल जुलुस पश्चात् कोण सभालाई सम्बोधन गर्दै लमही नगर कमिटी इन्चार्ज कमरेड उज्ज्वलले सरकारले तत्काल तीन बुँदे कार्यान्वयन गर्नुपर्नेमा जोड दिएका छन् । उनले तीन बुँदे सहमति कार्यान्वयनमा षड्यन्त्र भैरहेको आरोप पनि लगाएका छन् । उनले ३ बुँदे सहमति कार्यान्वयन नहुँदासम्म पार्टीले चुप नबस्ने उदघोष समेत गरेका छन्।

मसाल जुलुसका सहभागीले सरकार विरोधी नाराबाजी गर्दै मसाल बालेका थिए । मसाल जुलुस प्रदर्शनमा ३ बुँदे सहमति कार्यान्वयन गर , साम्राज्यवादी षड्यन्त्र विरुद्ध देशव्यापी संघर्ष, आस्थाका बन्दी रिहाई गर, राष्ट्रघाति एमसिसि खारेजी गर, एकीकृत जनक्रान्ति जारि छ , जस्ता नारा लगाएका थिए।

लमही नगरकमिटी इन्चार्ज कमरेड उज्ज्वलको नेतृत्वमा भएको
मशाल जुलुस प्रदर्शन कार्यक्रमको सहजिकरण भने नेकपा दाङ जिल्ला कमिटि सदस्य हरि यादवले गरेका थिए।

सिस्ने अनलाइन

सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो।