दाङको राजपुर गाउँपालिकाको नाम र पालिकाको केन्द्र टुंगो लागेको छ । गाउँसभाको बैठकले पालिकाको केन्द्र वडा नम्बर ४ दुलैयामा तोक्ने निर्णय गरेको छ भने, नाम राजपुर वेला गाउँपालिका राख्ने निर्णय भएको अध्यक्ष शरद बुढाथोकीले जानकारी दिए ।
राजपुर र वेला गाउँविकास समिति गाभिएर पालिका बनेको थियो । पालिकाको केन्द्र सबैलाई पायक पर्ने स्थानमा तोकिएको र नाम राजपुर वेला गाउँपालिका राखिएको हो । यस्तै गाउँपालिकाले आगामी आर्थिक बर्षको लागी ५३ करोड २० लाख ७१ हजारको बजेट प्रस्तुत गरेको छ । उपाध्यक्ष धनपती यादवले गाउँसभाको बैठकमा चालुतर्फ ३३ करोड ६० लाख ३१ हजार र पूँजिगततर्फ १९ करोड ६० लाख ४० हजार बजेट प्रस्तुत गरिन् ।
आर्थिक विकास तर्फ ३ करोड ४५ लाख ३२ हजार बजेट विनियोजन गरिएको छ । जस अन्तरगत कृषि, पशु सेवा, सिचाइ, भूमि व्यवस्था सहकारी तथा गरिवी निवारणको लागी ३ करोड १ लाख ६७ हजार, उद्योग पर्यटन प्रवर्धन, लघुउद्यम विकास तथा बजार व्यवस्थापन तर्फ ४३ लाख ६५ हजार बजेट विनियोजन गरिएको छ ।
सामाजिक विकास तर्फ २० करोड ४० लाख ७५ हजार बजेट अन्तरगत यूवा तथा खेलकूदमा १६ लाख, शिक्षामा १४ करोड ५९ लाख, स्वास्थ्यमा ३ करोड ५५ लाख ७५ हजार, लैङ्गिक समानता तथा सामाजिक समावेशीकरण ९० लाख २० हजार, भाषा तथा संस्कृति ५ लाख, खानेपानी तथा सरसफाइ तर्फ १ करोड १४ लाख ८० हजार बजेट विनियोजन गरिएको छ ।
पूर्वाधार विकास तर्फ १८ करोड ९८ लाख ६० हजार मध्य यातायात पूर्वाधार ८ करोड ४३ लाख ६० हजार, भवन आवास तथा सहरी विकास ८ करोड ६० लाख, विद्युत तथा उर्जामा १२ लाख, अन्य पूर्वाधार १ करोड ८३ लाख बजेट विनियोजन गरिएको छ । सुशासन तथा अन्तरसम्वन्धित क्षेत्र १ करोड ८६ लाख ३८ हजार मध्य प्रशासकीय सुशासनमा ४३ लाख, बित्तिय सुशासन १३ लाख बजेट प्रस्तुत गरिएको छ
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
