कुलदीप न्यौपाने
घोराहीका सक्रिय युवा एवं सिस्ने अनलाइनकर्मी हिमाल महरा गए राति चितवनबाट घोराही आउँदै हुनुहुन्थ्यो । घोराही प्रवेश गर्नैलाग्दा कटुवाखोलानेरको दृश्यले उहाँलाई झस्कायो । रातको ११ बजे चिसो बढिरहेको थियो तर सडकबाट टिप्पर पल्टेको वा कुनै व्यक्ति जीवन रक्षाको माग गर्दै कराइरहेको दृश्यले उहाँ सबै बिर्सेर उद्धारमा लाग्नुभयो तर एक्लै केही लागेन ।
त्यतिबेलासम्म धेरै गाडीका चालक, सहचालक र यात्रु जम्मा भइसकेका थिए तर उद्धार गर्ने आँट कसैलाई आएन । प्रहरीले खबर पाउनका साथ वडा प्रहरी प्रमुख दिनेश रिमाल र जिल्ला ट्रफिकका प्रहरी नायब निरीक्षक उत्तम जिसी घटनास्थलमा पुग्नुभयो । तत्काल अन्कित भाडा पसलबाट क्रेन मगाइयो । गाडीमा च्यापिएका चालकको दुःखाइका कारण चित्कार बढ्न थालेपछि वडा प्रहरी प्रमुख रिमालले राप्ती स्वास्थ्य विज्ञान प्रतिष्ठानमा स्वास्थ्यकर्मी बोलाएर दुःखाइ कम गर्ने सूइ लगाउन लगाउनुभयो ।
त्यतिबेलासम्म हिमाल महराले फेसबुकपोष्ट गरिसक्नुभएको थियो । सो पोस्ट देखेर हामी पनि केही गर्न सकिन्छ कि भनेर दाई दिपेन्द्र न्यौपाने र म गाडी निकालेर घटनास्थल पुग्यौं । झण्डै एक किलोमिटरको दूरीमा सवारी दुर्घटना भएको र कुनै व्यक्तिको जीवन रक्षाको याचनामा कराइरहेको सूचना पाएर हामी मस्तसँग सुत्न चाहेनौं र चाँडोचाँडो घटनास्थल पुग्यौं ।
हामी पुग्दासम्म केही पनि काम भएको थिएन । कसरी निकाल्ने भन्ने योजना मात्रै गरिदै थियो । गाडी अफ्ट्यारो ठाउँमा भएकाले चापिएको मान्छे निकाल्न निकै गाह्रो थियो, त्यो पनि रातको समयमा ।
क्रेनले तानेर निकाल्न सम्भब नभएपछि ग्रेन्डर मेसिनले चापिएको भाग काट्न लागियो । यतिबेलासम्म रातिको १ बजिसकेको थियो । केही भाग काटेर हाम्रो गाडिमा भएको इलेक्ट्रोनिक चेन पुलीको मद्दतले चापिएको भागलाई छुटाउन सफल भयौं । १ः१५ मा ड्राइभरलाई निकाल्न सफल भयौं ।
गए राति ट्राफिक चोकको कटुवा खोलानजिक दुर्घटनामा गाडीमै च्यापिएका चालक मकवानपुर हेटौडाका सूर्य लामाले यसरी तीन घण्टापछि नयाँ जीवन पाउनुभयो । उहाँ राप्ती स्वास्थ्य विज्ञान प्रतिष्ठानमा उपचार गरी आज घर फर्किसक्नुभएको छ ।
सगरमाथा सिमेन्ट कारखानाको चुन ढुङ्गा बोकेको टिप्पर घोराही नवलपुर जोड्ने पुल नजिक दुर्घटना भएको हो । स्थानीयका अनुसार चालक लामाले मेरो गाडी बिग्रेको छ भाग्नुस है भन्दै बिस्तारै गुडाएका थिए । तर, भन्दाभन्दै गाडी पल्टियो र चालक च्यापिए ।
सहचालक फाङ हाले पनि चालक लामा भने गाडीमै च्यापिनुभएको थियो । प्रदेश राजधानीको जिल्ला सदरमुकामभित्रै दुर्घटना हुँदा पनि उद्धार गर्ने कुनै उपकरण नहुनुको पीडा राम्रैसँग झल्कियो यो घटनामा पनि । धन्न वडा प्रहरी प्रमुख र जिल्ला ट्राफिक प्रमुखको सुझबुझपूर्ण नेतृत्व तथा हामी केही युवाहरुको जोखिम मोल्ने साहसका कारण उहाँको ज्यान बाँचेको छ । अब यसरी स्रोत साधनको अभावमा उद्धार हुन नसकेर कसैले दुःख पाउनु नपरोस् ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
