रुकुम पश्चिममा आज एकै दिन १८ जना कोरोना संक्रमित थपिएका छन् । एक कार्यालयका प्रमुखसहित सोही कार्यालयका नौ कर्मचारी, स्वास्थ्य सेवा कार्यालयका एक कर्मचारी, तीन प्रहरी र मुसीकोट सल्लेका दुइ स्थानीय गरी मुसीकोटमा मात्रै १५ जना संक्रमित फेला परेका छन् । संक्रमित भएको स्थानीय भारतबाट आएर होम क्वारेन्टाइनमा बसेका हुन् ।
त्यस्तै सानीभेरी गाउँपालिकामा २ जना नेपालगञ्ज अस्पताल गएर फर्केका संक्रमित देखिएका छन् भने चौरजहारीका एक जना गरी रुकुमपश्चिममा मात्रै १८ जना संक्रमित भेटिएका हुन् ।
चौरजहारी प्रयोगशालामा गरिएको परीक्षणबाट कोरोना पुष्टि भएको हो । मुसीकोट नगरपालिकाका २७ जनाको स्वाव परिक्षण गरिएकामा १५ र सानीभेरी गाउँपालिकाका १० जनाको स्वाव परिक्षण गरिएकामा ३ जनामा कोरोना देखिएको स्वास्थ्य सेवा कार्यालय रुकुम पश्चिमका कोरोना रोग नियन्त्रण फोकल पर्सन इश्वर रावलले जानकारी दिनुभयो ।
त्यस्तै जिल्ला अस्पतालको आईसोलेसनमा रहेका २ जनाको दोस्रो रिपोर्ट पनि पोजेटीभ आएको छ । यो संगै जिल्लामा संक्रिय संक्रमित २८ जना रहेका छन् । रुकुमपश्चिममा अहिलेसम्म ५८ जनामा संक्रमित भएकोमा ३० जना निको भएर घर फर्किसकेका छन् ।
दुइ पालिका र तीन वडामा सील
संक्रमितको संख्या एकाएक बढ्न थालेपछि मुसीकोट नगरपालिका र सानिभेरी गाउँपालिकामा सील गरिएको छ । जिल्ला प्रशासन कार्यालयले एरिया सील घोषणा गरेको हो । त्यस्तै आठबीसकोट नगरपालिकाले पनि वडा नम्बर ९, ११ र १२ मा सील गरिएको छ ।
तीवटै पालिकाले१४ दिनयता संक्रमितको सम्पर्कमा रहेकाहरुलाई आफ्नो विवरण दिन आग्रह गरेका छन् ।
जिल्ला प्रशासनद्वारा अत्यावश्यकीयबाहेकका सेवा बन्द
जिल्ला प्रशासन कार्यालय रुकुमपश्चिमले कोरोना संक्रमण बढिरहेको भन्दै अत्यावश्यकीयबाहेकका सेवा बन्द गरेको जनाएको छ । प्रमुख जिलल अधिकारी उपेन्द्रराज पौड्यालले जरुरी सूचना जारी गर्दै अत्यावश्यकीयबाहेकका सबै सेवा अर्को सूचना जारी नहुँदासम्मका लागि स्थगित भएको जानकारी गराउनुभएको छ । सोमवारदेखि सो सूचना लागु हुने छ । अब जिल्ला प्रशासनबाट शान्ति सुरक्षासम्बन्धी सेवा, ठाडो निवेदन र उजुरी, मुद्दा, अत्यावश्यकीय सवारी पास, विपद् ब्यवस्थापन र अत्यावश्यकीय सेवा मात्र सञ्चालन गरिने छ ।
त्यस्तै जिल्ला प्रशासन कार्यालय रुकुमपश्चिमले अन्य सार्वजनिक सेवा प्रदायक कार्यालयले पनि अत्यावश्यकीय सेवा प्रवाह गर्नुपर्ने अवस्थामा मात्रै स्वास्थ्य सुरक्षाका मापदण्ड अपनाएर गर्न सकिने जनाएको छ ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
